羅馬的第一個晚餐 – Tempio di Mecenate

經過一整晚的飛行，再加上時差關係，已經有成30個鐘冇瞓過，所以我同爸爸都極度疲倦，固此，晚餐就在hostel附近食。

出發前已經o係google map搵定附近有乜好餐廳，所以直接去睇下有冇位。

難得o黎到意大利，一定要瘋狂食意大利菜……..

第一餐就揀左呢間 – Tempio di Mecenate

以當地餐廳既size，呢間算大。食既係大路意大利菜式，去到有9成滿，可以即時入坐，同時又熱熱鬧鬧。

唔夠瞓就自然冇乜胃口，不過都叫左四樣野。

因為爸爸鐘意食菜，所以叫左個沙律，睇得到既新鮮，蕃茄仲要超甜。

Ham & Melon，亦係走唔甩啦。火腿咸香冇得頂，蜜瓜又係超甜，食完呢兩味都開始飽飽地。

牛仔肉配火箭菜，嗌呢個主要原因都係因為有菜食，本來諗住d菜係煮過既，但黎到先發現原來唔係，睇黎當地都幾難搵到煮熟左既菜黎食。

不過冇所謂啦，d牛肉煮得好淋、好入味，但就咸左d，一貫意式口味啦，係比我地食開既濃味d。

最後，一個spaghetti carbonara作結。煮得好好，麵條al dente，煙肉咸得黎好香，個汁仲係充滿蛋味。不過要注意，一定要趁熱食，如果唔係就會變成一舊舊。

十分完滿既一餐，為整個旅程開左個靚頭。