[吃在松山] とら食堂

今次四國之旅其實都預左好似返鄉下咁，一定唔會似得去東京大阪咁繁榮。不過諗住有過逗留高松數晚既經驗，好多野都解決得到掛。

經過三日廣島之後，就開始自駕了，第一站就係愛媛県既松山。

我地book既酒店o係大街道站附近，check－in完就落街搵野食了。

酒店一落棲下就已經係商店街，而圍繞住商店街就一定係食街，所以一定有好多野食。

但由於勁大雨，所以都唔想行太遠，奈何日本實在太多居酒屋，唔係太想食熱氣野既我地，唯有好努力咁搵，最後因為見到佢個門口話有そば(soba)，咁我地就衝入去啦。

點知睇menu，冇既。。。。。。。原來呢度又係一間居酒屋。

唔緊要啦，照食。

全日文menu，好地道囉。。。。而老闆同老闆娘又唔識英文，我地又唔識日文，咁識睇幾粒漢字既我地，叫左d識既先，

首先黎個炸豆腐

呢個好食喎，幾時都話最普通既野就最難整得好食，而好食既時候又最感動。即叫即炸既滑豆腐，加埋蘿蔔蓉同汁汁，完全冇外加調味已經好好食。

跟住叫左個玉子燒，又係普通野啦，不過又係即叫即整，熱辣非常，最令人驚喜就係入面極度juicy，9分。

你睇，幾juicy～～

menu上其他野已經又炸又燒，想搵d菜食下喎，又好似只得沙律，咁就用盡一切日文單字加身體語言去表達我地想要碟熱既炒野菜。佢好似明，但又好似唔明咁。過左一陣，竟然真係出現左一碟炒野菜。

呢碟炒野菜不得了呀，份量好足，圖中見到有洋蔥、青椒、紅椒、紅蘿蔔、椰菜、蔥花等等。鮮甜之餘，仲好夠鑊氣，正，10分！

最後見到隔離枱叫左個貌似拿破崙炒意粉既東西，又試下order啦。

呢個又係好驚喜，鐵板上已經加分啦，仲有蛋皮墊底。上面既茄汁、意粉、煙肉等等既配料又洽到好處，好耐食過咁有heart既拿破崙炒意粉了。

好滿足既一餐，鐘意飲酒仲有飲野放題。